الكاتب و الاديب د. صلاح البسيوني يكتب عواد باع أرضه
عواد باع أرضه
تأليف د. صلاح البسيونى
في زمن مضي دارت احداث تلك القصة ..
عواد بتاع زمان فلاح جاهل فقير غلبان .. يلبس جلابية زرقاء وطاقية رأس بيضاء ويتعطر بعرق جسمه .. ولما الشمس تشد يحمي رأسه بمنديل محلاوي ويحمي عينية بظل أيديه .. ضحكت عليه غازية .. وعلشانها باع أرضه وأصبحت الأرض في خبر كان .. وصارت سيرته على كل لسان .. يمشي وراه أولاد القرية في أزقتها يزفوه بأغنية ( عواد باع أرضه يا أولاد .. شوفوا طوله وعرضه يا أولاد .. يا أولاد غنوا له يا أولاد .. على عرضه وطوله يا أولاد ) وتناقلتها الحواديت الشعبية .
عواد بتاع النهارده أفندي فصيح يتكلم انجليزى فرنساوى المانى ويرطن بكل لسان .. يلبس بدل انجليزية .. ويتعطر بعطور فرنسي .. على رأسه برنيطة أمريكية .. وعلى عينية نظاره إيطالية .
عواد بتاع زمان كان بيتعامل بكيلة القمح وكوز الذرة.. وإذا ربنا فتحها علية يتعامل بالمليم والخمسة تعريفه .
عواد بتاع النهارده يتعامل بالدولار الأمريكي .. والين الياباني .. واليوان الصينى .. والمارك الألماني .
باختصار عواد بتاع زمان فلاح جاهل فقير غلبان .
وعواد بتاع النهارده بيفهم في كل شئ .. ويتكلم في كل شئ .. ويلعب بكل شئ .. من الكلمة للإنسان .
عواد فكر أزاي يكون كبير البلد .. كبير قوي .. فكر وقال لازم أتطور وتتطور البلد كمان .. زى كل بلاد الخلق من إنجليز وألمان .. وفرنسا والأمريكان .
عواد فكر وفكر وقال نبدأ نعمل مشاريع تدور ويدور معاها رأس المال .. وتكتر ويكتر معاها العمال .. والخير يعم والبلد تكبر والبشر تكبر في المقام كمان .. والخير يعم .
عواد فكر وفكر وقال نبيع حتة الأرض اللي في آخر البلد ضعيفة الإنتاج .. ونشتري حتة أرض خصبة تدي كتير إنتاج .. والخير يعم .
عواد باع أرض آخر البلد وقبض الثمن .
عواد فكر وفكر شويه كمان وكمان وأتخذ القرار الهام .. نبيع حتة الأرض الخصبه اللي في وسط البلد وانتاجها كتير .. وبسعرها العالي نشتري كام حتة أرض أرخص .. وبكده الأرض تزيد وطولها وعرضها يكبر .. وعمالتها اللي تشتغل فيها تكتر والخير يعم.
عواد باع أرض وسط البلد وقبض الثمن .
عواد فكر وفكر وقال فيه شوية شجر على الطريق للأرض .. دلوقتي مالهم عوزه .. لا محتاجين ظلها .. ولا زرعها ولا الفلاح دلوقتي محتاج ينام تحتها .. نخلعها ونبيع خشبها ونشغل ثمنها .. ويزيد مالها والخير يعم .
عواد باع الشجر وقبض الثمن .
عواد فكر وفكر وقام قال ما عاد فيه أرض ولا زرع إيه لازمة الجاموس والبقر والغنم .. ومنين تدر اللبن من غير علف تطعمه .. نبيع الجاموس والبقر والغنم .. ونشغل رأس المال .. والخير يعم .
عواد باع الجاموس والبقر والغنم وقبض الثمن .
عواد فكر وفكر وقال الميه يا إخوانا ثروة بتهدروها .. لا فيه أرض بتتزرع ولا أشجار تتروي ولا جاموس وبقر وغنم تتسقي .. المية ثروة بتهدروها.. وقام بهمة قوية وغير مجرى الترعة اللي بتدخل البلد إلى أرض الباشا صاحب الأرض الجديد .. وبكده يمكن استغلالها والخير يعم .
عواد باع المية وقبض الثمن .
عواد فكر وفكر وقال يا أهل البلد يا خلق الله أنتم إيه لازمتكم لما بقيتوا طول النهار نايمين ,, لا فيه أرض تتزرع .. ولا فيه زرع ينقلع .. ولا فيه شجر يتروي .. ولا فيه جاموس وبقر وغنم يتعلف .. ما تهاجروا في بلاد الله يا خلق الله وتشوفوا الرزق فين تلاقوه .. يعني تقلبوا رزقكم بدل ما أنتم زى الولايا كده قاعدين .. والخير يعم .
عواد جاب عقود عمل للفلاحين وقبض الثمن .
عواد فكر وفكر وقال نبيع البيت الكبير .. بيت العيله أثري وثمين .. ونشتري حتة أرض نبني عليها سرايا كبيره بجنينه مول .. والخير يعم .
عواد باع بيت العيله وقبض الثمن .
عواد فكر وفكر وقال لا أرض ولا زرع ولا شجر ولا جاموس وبقر وغنم ولا ميه ولا فلاحين ولا حتى بيت العيله القديم .. قام قال الأيد البطالة نجسه .. فكر وفكر كمان وكمان وأخذ القرار الهام .. وقال أشتغل عند الباشا الجديد خوجه .. والخير يعم .
عواد أشتغل خفير عند الباشا الجديد وقبض الثمن .
وفي النهاية ...
عواد بتاع زمان ضحكت عليه غازيه وباع أرضه فقط وقبض الثمن .
وعواد بتاع النهارده باع كفر الغلابه بأرضها وزرعها وشجرها .. جاموسها وبقرها وغنمها .. ومياهها وأهلها وبيت العيله .. وباع نفسه في النهاية وقبض الثمن .
باختصار ...
عواد بتاع زمان باع أرضه .. ونفسه .. وقبض الثمن .
وعواد بتاع النهارده باع البلد .. بماضيها .. وحاضرها .. ومستقبلها .. وقبض الثمن .
التعليقات على الموضوع